bear bear's blog~: 釡山賞楓の旅@day 1~

喺時候要寫喇
都攤咗半年囉
講真吖‥我其實係唔想寫
懶呀)))
但‥寫寫吓一路睇番啲相
啲記憶源源不絕從惱海浮現
唔寫點得呢！

今次去釡山係以睇紅葉同吃為主
買只是次要
結果咪‥

這個釡山遊
只是初步購思，未有咁快成行
多口問吓啫
估唔到咁巴閉
話機票好緊張喎
唔係化，咁鬼快冇位
有冇呃我架‥
但‥自己已幫襯佢好耐(可能唔熟唔食)
只係大家冇見過面啫
諗住只訂機票，自己訂酒店
又想坐釡山航空的
不過還未出到資料同價錢
佢話有個平價套票可選(都唔算平吖)
係去的話要快快落實
唓！諗都唔畀諗吓咩
咪‥一日咁鬼多囉
駛唔駛咁早呀
最憎有排都未去，要人早早訂！

但‥佢推介的酒店我又唔係好啱
諗住上網訂東橫
唔係鐘意佢乜嘢，只係覺佢好過韓國啲商務酒店啫
可惜住的日子係卡窿、卡窿咁
你話喇‥點住呀
唔通一日住、第二日又要搬咩
問 agent 可否幫忙代訂呢間
答覆係盡量喎
結果當然係冇啦
都唔知有冇做架啫‥
最衰啲人喇，唔係真係住就唔好霸鬼住晒喇，失格
想住的，又 book 唔到 (angry)

唉！惟有照 agent 的安排
住套票嗰間酒店喇
點解唔想住
咪‥就係上官網睇過啲相
都幾得人驚架 (surprise)

古老到死
不過韓國大多酒店係咁架喇
motel 我又唔 like
貴嘅‥我又唔想俾喎
(除非係日本温泉酒店就話啫) (笑)
為免夜長夢多
一於去馬
豁出去吧！

已唔影呢啲相好耐
out 喇‥
忽然 p~p 痕(笑)

喺網上劃了座位
坐窗口位有個中年女仕要求掉位
想坐路口，方便去洗手間喎
見她都算有禮貌
ok 冇問題
閒談間，問佢係咪一支公去旅行
係‥不過係跟圑的
只是被迫打散了
一條友幾有閒情逸緻啊
冇計喇‥全機滿座
大多全是韓國人

機餐唔駛多講唔好吃
問番我乜嘢嚟
我都唔記得囉‥
相‥又影得唔清唔楚 (笑)
加上我又冇吃
其實都唔好食的、不如可選食與唔食喇，喺機票減番好過
無謂大家浪費

最鬼憎啲韓國人架喇
佢哋一上機
便較低椅背，就算派餐都唔會自動波調整
係要空姐提點

雖則零晨機

丁點兒眼瞓也沒有
眼光光，好像很難捱至下機‥

到達釡山機場
只係得嗰幾班機嘅乘客
鬼咩！好早咋‥

離開機楊大堂
出面便是這樣了

以為好凍喇
竟然半點寒意也沒有
天氣感覺良好
秋高氣爽
很宜旅行呀！
推住超輕行李

過咗馬路、轉右手面
沿直路向前行

便見到車站
(釡山金海輕電鐵 Busan Gimhae Light Rail Transit ~ BGL)

喺車站鬼影都唔多隻
香港人都唔見一個
車票好易買的
毋須多講‥

月台
等車中‥

沿途風光
幾有沖繩 feel

搭了幾個站又要轉乘第二種車喇
這個類似接駁車

車廂唔多人
得幾卡咋

轉車喇
轉乘都市鐵道2號線> Transfer No. 2 Metro Line
搭地鐵去釡山站呀

買了一日乘車票

都幾似JR

真不會擺嘢喺車的架上
忘記攞多過乜
所以大家唔同文化、生活習慣大不同
都算多人啊
就冇香港咁迫、咁多人
又係有好多低頭族

到逹釡出站

離開月台
出閘區都冇乜人
這裏喺我哋呢幾日都要留下腳毛的地方

沿這樓梯直上便是了

到喇
呢個就係釡山駅

環顧四周
睇吓酒店在那
一望就望到東橫
唉！都唔係住佢‥

駅頭附近
這棵算唔算係紅枼呢
我哋見佢紅色嚟
就當佢係喇
好嘢‥見到紅枼

唔好掛住影喇
快快揾間核突酒店‥
望來望去都望唔到有肉酸物體出現
(老公話：唔駛揾喇，妳咪嗰件核突嘢囉)
打得少呀！(笑)

喺官網 dl 咗地圖
諗住都好易揾
點知係揾來揾去都找不到
經過都唔知呀
喺街行來行去，惟一辦法係問人
見阿珠媽路過
即攔途截停
畀地圖佢看‥見佢猶豫一會
點我倆向前行
即番返去車站方向
唔係化 (surprise)

咁‥咪行囉 (好似同地圖有些出入喎)
冇耐‥阿珠媽即返轉頭
帶我們到逹酒店門口
原來真係好鬼近的、揾路時已經過了
連聲謝謝
幾鬼好人呀
知自己錯，都立刻返頭幫忙
唓‥原來酒店從新裝俢
大佬‥唔該喺官網改改去吖
懶成咁‥揾食工具嚟架
咁攪法真係揾屎人呀！

酒店即係喺釡出駅旁
同東橫係打對面
即滙豐獅子咁(笑)

(Gwangjang Tourist Hotel 広場観光ホテル)

哦！咁樣靚仔好多好多呀
起碼冇官網擺啲相咁得人驚
又殘又舊、古老到死吖
企企理理
還可以望到海景添
酒店都算係咁喇
還未夠鐘
已比鎖匙入房
梳洗吓
都唔敢攤喺床呀
恐怕會瞓著

揾酒店時已途經此間食店
已想去食喇
因喺香港攞咗本釡山旅遊書介紹一間店舖出名吃此湯的
知喺附近
但又唔識路
問酒店識員點去
幾好呀，竟然叫人帶我哋去
原來真係喺轉彎位
就係我哋話嗰間囉‥
咪幾"橋"呢！！

諗住出名食店
原來空無一人‥
不過後來都多番啲人囉
拿著餐牌
看圖識叫囉
一上桌便是這些了
這餐就係我倆在釡山的第一餐早餐喇
睇相唔知嗰條長長係乜東東嚟
哦‥原來係泡菜
啲九菜點解會咁鬼老呀
好多渣，食唔到

釡山出名吃豬肉湯
喺香港睇書已想吃了
點食法，店員會教你點吃的
上圖有啲魚仔
佢話擺落啲湯一齊吃喎
其實都無須拘泥喇
鐘意點咪點囉
我倆覺一般咋‥
湯以為係奶白色的
點知唔係
味道又太淡、肉又嚡冇乜味
非常失望啊
可能喺首爾同濟洲飲過佢哋啲湯
很是好喝的
唉！係失望架
呢間都話出名
但唔係咁好喝囉‥
唔出名嗰啲
咪‥

唔識睇佢啲字
惟有係認電話號碼，就最好架喇
絕少出錯的
除非改了啫‥
不過‥又真係有發生呀
世事無絕對囉

食飽飽
跟住去逛街街
第一站南浦
嗰度話好似香港銅鑼灣
咁就好喇
可以逛餐飽了
老公就慘啲
只有陪行

不過第一件事要做的
出車站後
地下街有一間"屈記 "
老公即刻話要去睇睇傳聞話超平又幾好用的手霜
竟然間一件貨都冇
問售貨員話未有

我都唔明點解啲人話佢好正
"平"係都算幾"平"，如計番容量就未必喇
但‥又未至於話不買不可囉
" Vaseline " hand cream 夠好用又抵用
又唔講
一傳十、十傳百
網上威力很強
傻的 (我哋都係) (笑)

仲有 Market O 隻 Brownie 又話好好食
非也囉‥
(我知有人很愛，大家口味唔同)
喺香港買嚟一試
我覺食味好假
真係講唔出有幾好食
所以今次旅程一包也沒有買
"M O" 佢咁多隻出品
只覺隻 "芝士薯片" 好食外
別無他選了

現在香港好多有售
眼見囤積都好多貨吓
傳到話不買不可、話好好食的
價錢都唔貴添
同韓國買都差無幾
又唔見有斷貨或排長龍搶購‥
哼‥
有時真係要好好分析吓

這個搭地鐵出閘"行前多步"便可見
樂天噴泉
停住腳步欣賞吓囉
幾靚架，作為遊客都睇吓喇
有啲啲似水舞間咁款，當然冇咁大型，差好遠
百貨冇乜好行
都係轉戰街外好啲

就係呢間樂天百貨
睇噴泉在此

呢度就係南浦洞一帶
我一去到好像甩繩馬騮咁
叫都叫唔住
第一眼見到 innisfree 好像發咗癲咁
(香港有店了，cwb 時常要排隊)
一枝箭就衝入去
其實我冇乜話太鐘意此店
都唔知點解

臨出發前都叫老公撳住我架喇
唔好俾我亂嚟
緊係冇鬼用喇‥
喺呢間都算買得多
唔知邊個講
話會睇定啲，過幾日至買都未遲(笑)
結果全部推番晒呀！
不過這間啲店員好一般
冇乜禮貌
這裏都有幾間此店架

既然買開有鋪癮，唔忍喇
唔理三七廿一
一於見到又想買的
去馬囉
此處話係像銅鑼灣
當然九成護膚品店在此
我亦買得樂此不疲、不亦樂乎啊
買了好多袋
又鬼咁重

好怕去旅行又要拎相機、天書、沿途的戰利品
已很重很重了
緃使仲想買‥
已有心無力
有時我真係唔想逛架喇
這個係死結嚟架
冇辦法解決的

唔知點解喺香港見一些遊客 (不是陸客)
大多係老外
好不自在
兩手空空、沒有戰利品、天書、相機之類物體跟身
多麼輕鬆寫意

午飯時間又到
我哋去旅遊大多有 plan去"邊間"吃什麼的
今次亦唔例外
不過就少咗好多喇
因見到想吃的，唔係太遠或都唔會去呢啲地方
所以唔作罷都唔得
揾呢間嘢
都揾到我哋傻呀
兜來兜去，大路轉小路都找唔到
往往係咁架
話揾埋呢次再揾唔到
放棄
最後‥當然找到了
幾鬼隠敞呀
揾屎人咩！

吃什麼
海鮮鍋呀
唔知好唔好食架
睇佢介紹同相好鬼吸引咋
好多人都係咁架喇
你估淨係我倆咩！
所以影食相影得靚
有著數架啲食店

一入門口已坐滿當地人
惟有一直入
不過食食吓已坐滿了
那時已兩點鐘喇
啲人咁晏食嘢咩﹖！

點了這個
唔貴喇比起喺香港吃
有啲人好怪架
去旅行唔會食當地嘢
返到香港又會揾嗰度啲嘢食

例如日本咁
唔食吓當地啲寿司、刺身或名物
只吃麥當當、吉野家
跟住就講日本嗰啲好食過香港喎
話知你食揾全世界這幾間快餐
好食到點咪又係一個包同牛肉飯
冇意思架‥

好快手阿珠媽已火速遞上
今次啲九菜好過早餐吃的‥
紫菜伴飯好好吃
唔錯

第一件事
老公一定要 beer beer 佢

終於出現喇
睇樣好似，我講係"好似" 好多咁‥

水滾喇
點解冇乜色

原來經阿珠媽攪攪佢
沉喺底的泡菜同辣粉經她一攪
立即上色了
跟手剪魷魚同又掉埋啲蚌同帶子殼
我用好似好多嚟形容此鍋
係因為一路食一路只吃到魷魚等物體同大豆芽
呢啲咪多囉
其他只得一件半件
這樣嘅海鮮鍋未免有些呃人啩
有啲"成抽"好似豬腦的物體
唔知係乜嚟
不過又幾好食
整個鍋只覺吃魷魚居多
只可以講不好吃
食完超勁膽固醇(笑)
好彩不算貴
無妨‥

吃完已好晏
因實在太多物品、又沉重、又筋疲力盡
唔想兼無可能再逛下去了
有錢執都冇力呀‥