22/Mar/2008 (sat)
喺"築地"食完豐富早餐後
下一站到了"涉谷"逛街，一出車駅，人多到嚇屎人
又行吓百貨公司，109、西武、東急、Parco.等，當然會逛吓其他潮店，睇吓有乜啱心水
﹝忠犬﹞ハチ公像
街頭又種了一些鬱金香，好似尖咀廣東道一帶啊
真架…好靚
只買咗幾件衫，又差唔多時間鬆人
你睇…等過馬路時，人頭湧湧很有壓迫感
畀喺香港 Sogo過馬路時還要多人啊！！！
"自由が丘駅"
這個地方很是舒服，車駅兩旁只有一些店舖，人唔太多，很是寧靜
喺日本會見到好多單車，每架單車都好新淨好靚
唔好以為好老土呀，你估好似香港咩，淨得新界鄉下居民又或是送外賣才用
日本啲男男女女穿得很時髦的，都會踩著它代步
行了十零分鐘，終於到了目的地
拾級而上
"Sweets Forest"
內裏有八間唔同口味的甜品店組成
"ル スフレ" (Le Souffle)
呢間出名食"梳乎厘"嘅餐廳
我哋行到好攰喇，梗係入去抖抖
點了兩個，要等廿多分鐘喎，話知你整幾耐喇，攰到屎
"雲喱拿梳乎厘"
整個都係雲喱拿味的
"正"
要自己挖空中間少少，然後把雲喱拿倒進去的
嗱！這個係失敗之作(挖得太深喇)，當然唔係我整，我點會咁水皮
男仔都係笨手笨腳
哈…哈…為食到死，才整到咁醜樣
不過醜怪歸醜怪，但都非常好味道！！！
"紅莓梳乎厘"
整個都係紅莓味
這個是我的，係咪差好遠呀
靚幾多，又唔太甜、好香好好味啊！！！
香港嗰間"太平館"差好多皮架
係度 hea咗好耐喇，因對腳行到好攰好痛，完全唔想走，而且又睡魔急 call…
但…都要走喇，唔可以嘥時間
整個環境係咪好舒服好寧靜呀…
呢棵唔知係唔係玫瑰花嚟呢
我見幾靚至影你咋
行至另一邊，兩旁有食店、書店、花店、時裝店
而中間有好多排櫈，啲日本人一家大細、情侶坐在這裏有休息、食嘢、傾偈
好不寫意，不過當日都幾晒架
啲花花好靚好新鮮
"惠比寿像"
好快又到了另一個地方喇
"atre"
駅旁有幾間售賣好靚的蛋糕店
買了兩個芝士撻
剛剛出爐，又香噴噴，好好味啊！
我好鐘意食日本啲芝士撻或蛋糕
尤其北海道某隻芝士蛋糕，現在還對它念念不忘
喺惠比寿車駅的另一端
有條數百米長廊的自動行人電梯可行至 garden place 一帶
真係好長好長架
好有札幌啤酒園 feel
裏面一帶都係高尚購物商業區，博物館、寫真館、餐廳等
"三越百貨"
香港已冇晒 lu
都冇嘢睇嘅
"戎"
晏晝只係食咗甜品，都冇乜嘢到肚呀
就去呢度食喇，時間都五點多囉
食少少嘢醫醫肚喇，但都唔覺肚餓，至在 hea 啫
在頂層 39/ F
可一覽東京的夜景，算唔錯
"炸雞"
唔嚡好味，沒有炸過龍
"關東煮"
有三文魚、蘿蔔
最好味係蘿蔔，夠晒入味，三文魚太嚡喇
"雜錦串燒七點"
每樣都好味，唔會嚡，內裏還有汁液
"正"
由高層影落地面的
開始入夜喇
不過我哋都要走 lu，如果唔係再夜啲個夜景還要靚啊！
入夜後的景物同下午影時有很大分別
着了燈，每楝建築物都很靚
拜拜喇
又再要經過條行人長廊才可到車駅回新宿去
"新宿"
入夜喇，喺新宿通街都好多人
其實都唔會分早與晚，都係咁多人架喇
"三国一"
喺度食晚餐喇
"茄子肉碎湯烏冬"
像極魚香茄子，好濃好味道
呢間嘢我喺東京時都幫襯幾次喇，這個每次都唔同整法嘅，可能唔同師傅啩
唔理喇，最梗要好味
"稻庭冷烏冬"
這個係我的，我好愛食烏冬，這個食法又係我的至愛
係幾煙韌，不過太硬囉，反而覺麻麻咋
軟番啲會較好
食飽飽後，喺隔離"百果園"買的飯後甜品
唉！有冇攪錯呀，一點兒味道都沒有，我以為自己飲梗白開水
回水呀，成三十蚊兩嚿…把鬼
"歌舞伎町一番街"
各自各逛咗一陣
百貨公司都閂晒門囉，好夜喇，見都冇乜嘢好行，又攰到屎
喺時候要打道回酒店喇
買了一大堆零食回酒店吃
"番茄"真係好好味好鮮甜，正正正
還有右下角喺"中村屋"買的咖哩包，好好味架…
今日真係好攰好攰喇，搭通宵機丁點兒都沒有瞓過
一落機便四圍去，著住對波鞋局住對腳，唔多唔少都有廿四個鐘囉，話你聽唔臭就呃你嘅
總之又臭又攰，要好好浸浸浴，才可消除一整天的疲勞
一晚瞓天光架…
