09/03(fri)→函館→小樽→Neuschloss Hotel
今日要好早起身，因要乘7:04列車到小樽
5:30已起身梳洗喇，好眼瞓呀
↑同酒店講聲
↑嗱~我哋就係搭喱架靚仔列車到札幌→再到小樽，車位既闊度同飛機差好遠啊，坐得好舒服
約坐四個鐘左右
↑在車駅大堂買既便當，好咸啊，認真麻麻哋好食
至於嗰個芝士蛋糕(昨晚已買定)，個人覺得好好食喎
↑11:15左右終於到達小樽喇，把行李鎖在車駅大堂既 locker，便四圍行吓lu
↑沿車駅而落，個地幾咁污糟，都唔知點行好，啲雪似溶非溶，好鬼死跣架，我哋行起路來好似企鵝一樣，論論盡盡，好鬼死醜怪(好彩冇熟人見到啫)
↑終於行到今日要食嘢既地方海貓屋喇，點了茄汁蟹意粉和咖哩牛肉飯
牛肉飯 O.K. (通常叫喱啲都唔會出事既)至於個意粉呢，唔夠惹味囉~ ( 可能唔記得落味精掛 )
食完午餐出嚟，又落咗一陣幾大既雪
↑食完嘢，還有少少時間，走咗去運河逛逛和行一吓附近的商舖，經過喱間かま栄買咗個小食，順便睇吓製作過程，運作全人手加少量機器(日本咁先進乜唔係用晒機器咩)，咁佢哋就好喇，起碼冇咁多人失業啊！
好似春卷既魚板又幾好食(好食過紀文)
時間差唔多喇，要行番上車駅攞行李，等今天送迎既專車載我哋到酒店
↑喱間就係我哋今晚借宿一宵既地方喇~~Neuschloss
↑從窗外可以望到海景和遊樂場
**都唔知點解佢要用咁多度門(間房又唔係大)，除咗大門，行兩步到咗玄關有一度門才可以入到房間，出咗房行兩步，另外一面又有一度門先可以入去洗手間，再細分洗手間一度門，浸温泉又有一度門，淨係開門閂門都攪到你頭暈眼花
↑餐廳氣氛幾浪漫架，人又唔多，情調唔錯~~
今晚食既法國晚餐【個manager問我哋有乜嘢唔食喎，我話乜嘢都食架~~(心諗)除咗 ng ng 囉(米田共)呀】！
↑食物幾好食(除咗個主菜唔同外，其他一樣)，份量係就係細咗啲，但都唔駛畀碟白飯我哋架，又冇 order，破壞晒個氣氛
法國大餐多X魚就聽得多，乜而家改咗多碟飯咩…
↑最後當然有既餐茶喇…
↑回房浸吓温泉，話就話睇到海景，但整個窗畀啲木條遮咗一半(唔遮又唔得喎，因企起身時真係會畀人見到，嘥料呀，有等於冇，冇意思囉，好似喺浴缸浸一樣)
其實間酒店唔錯架，唔同其他傳統式温泉酒店，比較新潮，冇嗰啲咁古老囉
又走咗去睇吓個大浴池乜環境，得二個池(一個室內、一個室外)，冇人浸既，我都係浸咗一陣，便返房再浸。
因住過渚亭有得比較，當然前者好過後者喇，人哋個海景同佢個海景，簡直冇得揮喇，又係露天(當然梗係仲有啲還好，但現在是攞渚亭同佢比嗎)咁樣真係扣咗好多分囉！
Hokkaido@ 1 2 3 4 5 6 7 8 9 10 11 12 13 14 15
