晚上十一時半左右返到屋企，好攰呀！真係玩得好開心，但就唔見咗好多蚊$$$
除咗第一天到埗沒有落雪外，其如十四天就日日落唔大唔少既雪，真係好鬼煩，攪到好多行程受阻，完全唔掂！有時見到好多網友問三月會唔會落雪，有D人話三月唔會有雪落架，又沒有其它嘢好睇。記住唔好同天氣估，你係猜不透的！(好似女人心一樣)
在雪地行，真是好痛苦，明明十分鐘的路程，可以行足半個鐘，如果拎住重物(行李)，仲死多幾錢重，拖又拖唔到，要拎起行，問你死未！最怕遇着D似溶非溶的雪地，又跣又滑又污糟不堪，我最怕就係喱D，就算著了防滑鞋墊有少少幫助外，始終都係行到對腳好鬼死攰！特別係D腳趾，因要抓住嚟行。
我發覺有D香港人好怪，如果去某D景點遇著他們，你一講廣東話，佢會即刻眼超超，又要扮自己係當地人，但又唔知比自己啲眼神、動作所出賣，大佬唔係得你一個有錢去旅行架！有乜好超呀(未見過靚仔靚女咩)！一D禮貌都冇！其實香港人和台灣人好易認，由其是女生唔多化妝、髮型、衣著老土和男生們鐘意孭背囊、穿著較鮮艷和過大的風衣(我講的是一部份人，不是一概而論，不要對號入座)，一望落去就認出，真係百發百中架，絕無吹水！在航機當然又遇上一D失禮的港人，真係好討厭！醜死鬼！有機會我會講既！
十五日既行程當中，歎了六天温泉，轉了九間酒店。撻了兩次兼四腳朝天、流血仲好鬼痛。乜嘢都食一餐，唔肥死都幾難。我既摯愛士多啤梨幾乎都食到厭。頭髮就好似地拖咁粗，手既皮膚就好似砂紙咁嚡(我諗因用熱水洗手)。好彩做足十四日水份面膜兼water sleeping pack 面部就 keep 住滑一滑啫。兩個喼去就四個喼返啦…唉…仲有係要減肥、減肥、減肥、減肥、要好努力咁減肥啊！知冇
