呢幾天嘅天氣凍到人都唔願郁呀，仲以為自己到了第二度旅行
因乜解究香港會咁寒冷架，唔通係大陸落雪同我哋有關…都唔奇喎
尋日唔駛返工，應該係唔會咁早起身架喇(通常眠到下午)
週六整天下雨，很是討厭
我好憎攞傘嗎，去街又唔方便，濕漉漉又污糟
加上又咁凍，最好就係冬眠
因訂了過年糕點，唔去唔得，落雨天真係唔想出門架
"名人坊"
這間位於中環九如坊蘭桂芳酒店內
就係訂了呢兩個
一個蘿蔔糕、一個芋頭糕
返到屋企已消滅了一個喇，都唔需要等新年囉
(芋頭糕很是好吃，而蘿蔔糕就"削"了點，但…都唔差)
一場嚟到，加上未食過"九記牛腩"
曾在中環工作咁耐，只聽同事和雜誌話有幾咁好食，自己從未走去試試
今次終可一嚐喇
腩伊(走油)
走了油沒有那麼肥膩，是同事教的
湯真是非常清甜，牛腩就嚡口喇
而咖哩筋腩河，很入味不太辣
牛筋會好味啲，因唔嚡啊
腩河，呢個才是我的
牛腩就真係嚡咗啲啲囉
生菜都幾好味喎，可能啲油有啲香味
整體不過不失，都沒有令人失望
服務又冇講到好差喎，個伙記又幫人揾位，走時又識講多謝
食幾拾蚊嘢，唔好要求太多喇
就算係酒店，都未必有好服務架
既然出嚟逛街街，落雨都唔理喇
四圍逛吓，又走咗去"許留山"食我最鐘意的芒果甜品
因太凍喇，食完凍上加凍，係由心震出嚟嗰隻
下次太凍都係咪攪
當然好味
逛完銅鑼灣才行番落灣仔
又再食過
"泰妃雞"
在灣仔活道，店內又係好細小
海南雞飯
好味道，雞好滑就算係雞胸都唔嚡架
不過飯就太少喇，同"勝利小廚"比少好多呀
香茅雞亦河
呢個好食惹味
唯一美中不足是它們的茶杯有好大漂白水味啊
由朝逛到晚，需然落雨但又唔覺好凍喎
可能喺市區又多人喇
落雨唯有轉戰商場再逛過
見到佢，對腳又比佢攝咗入去喇
買了一個掛衫 / 褸既架
再買了一個小型架，掛乜都好喇
送的利是封，"無印"連利是封都型仔過人架
