15/03/07我們在北海道的第十五天

15/03(thu)→札幌→新千歲空港→香港→温暖既屋企

 

今日既天氣好彩只係早上落過一陣間雪，唔係就麻煩喇

十五天既旅程話咁快就喺今日結束，真係好唔捨得呀……

今天冇喺酒店食早餐，寄存行李後，便走咗出去揾食喇，順便視察吓周圍既環境，睇吓邊條路線喺比較好行啲去車駅

↑なか卯

我哋就喺係地下街內食早餐

↑因為我鐘意食烏冬又愛辣，所以喱個好啱我口味啊，好好食

↑而喱個除咗烏冬一樣外還有小牛肉丼，當然同樣好味喇

食完早餐，又再四圍逛，行李喼還有少量空位(唔好嘥)

，又睇吓買唔買到嘢，咦…反而喺紀伊國屋買咗幾本書，又打吓幾耐既書釘(今次買書既重量估計約有4~5KG)

不過始終都係最緊要睇吓由酒店到JR駅既路程難唔難行，點解咁講，我哋唔係空手行去車駅，而係拖住幾件大石頭喎(地上又通街都係雪，叫你行都幾係架)，因吸取咗上年走時既經驗(攪到好狼狽)今次絕唔可以再咁論盡

↑一早已買定U Seat車票返新千歲機場(因為實在太多行李既關係，顧得件行李時又揾唔到位坐)

時間都差唔多，要返酒店攞行李，同酒店和北海道講聲

後，後會有期

攞住幾件行李，行咗兩個街口，便從樓梯通向地下街行去車駅，由路面搬嗰幾件行李落樓梯都幾係架

，一個人搬咋(我負責睇…水)

，唉…見到佢一件件咁搬落去都幾慘架(真係於心不忍)

↑嗱…就係喱幾件大石頭喇……好…重…架

36分鐘既車程，已經到咗新千歲機場喇，快快手走去國泰check in，國泰counter冇人排隊，但過行李既x-ray有大量台灣團check in，冇辦法都要跟住排埋一份，用咗廿分鐘排隊才可行去國泰柜位check in，其實訂機票時已劃了來回座位(可唔需要咁傻跟住他們排，但拎住咁多件行李就要迫住咁做)，行李真係超重咗幾KG，不過冇罰我哋錢喎，咁就話知佢喇(就算係都唔驚，咪拎一件上機囉)，多謝國泰手下留情

唉…機場係就係好大，可惜大部份用作售賣手信(揾錢緊要)，而check in既地方實在太細啊

↑放低幾件大嘢後，真係一身鬆晒

，便行去食拉麵午餐lu，裏面有好幾間拉麵店選擇

↑我哋揀咗味の時計台

↑好辣架

，但…唔係好好食喎

↑喱個我既，又係麻麻哋

我哋始終都係鐘意食【一蘭】、【康庵】或【一風堂】既味道，諗起都留口水

↑在機場買咗三盒我鐘意食既函館芝士蛋糕

又要排隊入閘check in喇，日本人做嘢真係好鬼慢，加上又多香港旅行團，所以嘥咗好多時間只用嚟排隊，真係好無謂架

，不過喱樣都唔緊要喇，千祈唔好畀我哋再遇到第一日發生既事啊…

在航機上(原定4:20分起飛)，廣播話因唔知乜東東要加番啲燃油喎，乜唔係一早check好晒咩，臨時臨急要加油，唔係化

，好似好兒戲喎…咁恐怖既…

都擾攘咗好耐吓，仲未可以起飛，空姐唯有在機上派水給我們喇，見到一pair中年男女(旅行團)，要空姐畀啤酒佢哋飲喎，空姐同他們講：飛機未起飛係唔可以派酒精既飲料架，唉…真係好失禮，當然唔止喱樣，仲陸續有嚟…在機上呆坐到5:00才可起飛

飛機在跑道滑行時，有另一位男仕(旅行團)，打開頭頂既行李艙門，即時給空中少爺叫停(係人都知飛機開始起飛時，要坐定定架喇，仲做喱個動作，想啲嘢跌落嚟傷到人咩，唔化)，他可能唔服氣，又再次打開(飛機先剛剛在空中還未穏定)，個空中少爺都唔敢再行去阻止，可能驚他

，大佬，唔係靠惡就大晒，係講道理嘛，幾不知所謂，簡真神憎鬼厭，影衰晒啲香港人

有時諗諗吓做服務行業，真係好煩架，尢其遇到喱啲橫蠻無理既人，都要逆來順受，真係好慘

半路中途飛機遇着氣流，左右搖擺，都令人幾心寒

，唔只一次先驚嘛

到派餐時仲攪笑，那pair男女竟然間問空姐攞毛氈，唔係化

，之前人派時你哋唔要，當人派餐時就問人攞(喺唔適當時做不當既嘢)，都唔知係唔係玩嘢，個空姐回應他們，我派梗餐，完後再給你吧，答得好

仲有一個好多人都會犯既毛病，就係喺飛機降落在跑道還未停定時，啲人即拿臨開手機，那pair和他前面一堆團友都係做同樣動作，即時畀空姐面斥

其實我都唔知點解要咁緊張立即開電話，真係咁工務繁忙，非也……咪同人講嚟講去話我落咗機喇，係邊度邊度返咗嚟咁大把，有幾咁巴之閉啫

就算要報平安，都唔爭在嗰幾分鐘喇，唔怪得港人會給人冠以【港燦】之名，真係多得喱啲人唔少

，喺喱啲地方真係可以見盡人生百態，一樣米食百樣人，真係冇講錯架

 

返到香港喇，雖然返到自己温暖既家，十五日冇見，都唔係太掛住噃，反而我哋個心還留在北海道

 

北海道後會有期

 

Hokkaido@ 1 2 3 4 5 6 7 8 9 10 11 12 13 14 15