01/01/2008(tue)
今朝好晏先知醒，因尋晚無覺好瞓
可能喺"城山日出峯"冷親，攪到周身痛
推窗往外看
哦…落雪
應該落了一晚喇，地上鋪了很多雪
白茫茫一片，加上如此美景
很是美麗
其實諗過這件事好唔好講架，唔想導人迷信
尋晚完全冇覺好瞓，除咗不適外
就係比我見到啲唔想見既嘢
在剛剛瞓著時，給我在睡夢中
看見一個半身的女子在窗簾旁同我揮手，由左飄向右邊，還說了一句韓語
嚇到我即刻醒了，汗如豆大，真係好驚……驚
雖然畫面沒有恐怖成份，但已嚇至半死
唔知係真定假，不過就好真實
或者係我既 channel tune 咗去嗰度啩
梳洗後，出外逛逛
唔會再租車喇，又貴兼真係冇乜地方值得去的
諗住隨意便算吧
離開酒店，沿途已有好多雪鋪在地上
左諗右諗，都係要再去多次
一睇呢度，咪又係去探我啲老友記囉
(我發覺自己好鐘意乜都嚟多次，不過…最緊要係好嘢呀)
Teddy Bear Museum
有冇攪錯呀
入場費又加咗 1000₩
加幅仲犀利過香港呀
都唔知佢哋要揾幾多錢一個月
才可喺度生活呢
嗱…有啲相上次冇 post 出嚟架
依家睇番喇
玩啤牌，一齊玩吖
呢張幾得意架
蛋糕裏面全是 bear bear
呢個係特別版
用了 125 K 純金做的
不過張相太細，可能睇唔見啲毛閃閃吓
但個鼻就睇到金色喇啩
bear bear 結婚
呢度就係賣 bear bear 既地方
一眼睇晒，好細間咋
比我見到啲台灣和韓國人揸住啲 bear bear 貼埋面上影相
(唔准影相喎，犯規)
幾咁唔合衛生呀，黐埋啲面油落公仔度，污糟到死
唔好比我買到你哋嗰啲呀
外面就係花園
都有好多 bear bear 睇架
喺度野餐
釣魚
bear bear 館差唔多比我反轉咁滯，窿窿罅罅都比我行完喇
睇完行番入裏面食午餐
" Lotteria"
韓國出名連鎖餐廳，等同"麥當奴"
一份套餐
一個照燒雞包和牛肉堡、一杯可樂、提子汁、薯條、芝士雞條
個牛肉堡好似個蛋糕
兩個包包完全唔熱，又唔好食，認真把鬼
薯條又唔脆
食食吓，見到隻貓貓好可憐呀
瑟縮一旁，還在顫抖，所以牠要挨在門邊取暧
最衰度門給風吹開，把牠嚇了一跳
(可惜我愛莫能助)
離開在出口處會見到兩隻大肥 bear
拜拜喇…我的寶貝
向"如美地"方向行去，想去睇瀑布
(唔知有冇得睇呢)
但個地啲雪似溶非溶，非常之跣，又濕漉漉
便告吹唔去喇
費事諗，返酒店算數
冇地方可去，唯有又反轉間酒店喇
酒店大堂
見有這個，我又寫了幾張
將心願掛在這棵樹上，希望會實現喇
有 LV 架
不過…冇乜人行喎
Duty Free Shop
買既嘢同香港機場啲差唔多
那個紙牌公仔，用人氣亞 Rain 宣傳
cafe
酒店地下
竟然有隻大 bear bear
聖誕都過咗喇，都唔幫佢換番件衫既
佢好污糟架，我都唔敢摸佢
酒店內園
咁大間酒店又咁出名
又做遊客生意，你只會見到呢幾隻中文同英文咋
其他都唔知寫乜架，唯有靠估囉
"太自以為是"既國家
(其實係講新年有倒數活動)
倒數在此
又凍又露天，我哋都冇去參與
只在房間聽到好嘈咋
個假山隻龍會噴火咁大把囉
泳池
冇人會游架喇
內園外貎
終於近距離見到風車喇
好靚呀
李秉憲同喬妹曾在此拍的劇集" All In"之處
"石頭爺爺石像"到處可見
反轉完酒店
又係時候去食唔知係唔係"晚餐"喇
飯堂地方在停車場隔離
地上鋪滿雪喇
今次前菜我叫了她給我"魚仔"
係最好食的
本應吃 shabu shabu 的
但還未有牛肉送嚟，冇得食喇
又再點了最好味的"牛肋骨湯"
算係完美的結局吧
返酒店攞行李走人喇
你睇外面真係好凍好大風，個地唔係落雨喎，只係落雪攪成這樣咋，濕漉漉
這個女子是酒店職員，專責接待旅客上車下車攞行李
佢都要箍住條皮草在頸上架
睇見佢都好辛苦
上車喇，差啲冇位呀
拜拜，希望唔會再嚟喇
怕怕
到機場喇
落車 lu
機場大堂
賣手信既地方同 check in 喺埋隔離
當日有好多韓國人乘內陸機回國呀
又見他們買了好多箱柑回鄉，非常愛國愛自己的產品
還未夠鐘，走咗去機場樓上吃東西
得兩間食店，一間沒有開門
只有這間小食店
南瓜湯
唔夠熱又唔好喝
芝腿治
係呢個幾好食，起碼即整
一個機場只得兩間食店，都唔知有冇攪錯
一定要夠鐘才比你入閘架
原來裏面好細小，所以要分流囉
等上機呀
唔會好食既餐
回程乘搭 9:50 返港喇
韓國比我的印象真係麻麻咋
加上他們禮貌欠奉
再到此遊，就係掛住佢哋啲美食囉
Jeju @ day 0 1 2 3, Lotte Hotel, Teddy Bear Museum
