30/06/2007(sat)
香港→高雄→大遠百→光華觀光夜市→愛河→新崛江→六合夜市→金典酒店
今日喺機場都有唔少旅人出外遊玩，絕對唔遜色於其他假期
☝竟然間喺度會見到樂樂同盈盈喎(唔係化，BB都生埋，好似快咗啲啲喎)
☝搭10:25華信航空往高雄
但喺機上都呆坐咗40分才起飛(真係差唔多都到囉，嘥時間)
好難食嘅飛機餐
☝終於都到咗高雄喇
入境地方都好細，一出閘已經係攞行李之地
出境大堂都係一樣咁細㗎
☝要搭的士到酒店(20分鐘車程咋，好快)
沿途嘅風景區
☝放低行李，出外揾食喇
在酒店附近兜咗個圈，條街都冇乜人行嘅，只係得我兩個傻婆傻佬逛來逛去
終於比我見到個公車站，但真係好少見有巴士囉
喺台灣流浪狗都唔少㗎，真慘
☝揾到地方食嘢喇
店內
☝梗係食吓啲地道食物
有豬手飯、肉燥飯、灼菜同味精粟米湯(又好好食喎)
☝食完口渴到死
要飲好多水先掂，喱個西瓜牛乳好好飲(喺台灣必買嚟飲)
☝行咗咁耐，終於到了第一個景點大遠百百貨公司(山長水遠嚟到，都係逛公司咋，咁…不如留係香港逛)
公司巴士唔知係唔係免費呢
裏面同香港百貨賣嘅嘢差唔多
☝地庫有間惠康，唔係喎…你眼花喇…應該係頂好至真
而頂樓有間誠品
影完喱張相，又畀人話唔准影喎，唉…又唔係喺書店內，咁都唔得
當天書店內有樂隊唱歌，亦有好多人打書釘，各得其所，他們就好喇，又有凳坐喺度睇書或可坐在樓梯級，真係唔錯喎(香港唔會有㗎喇)，可以消磨一整天都唔會悶
☝台灣好難先揾到個垃圾箱，喺百貨公司門口畀我見到喱個，掉時掉呀，睇清睇楚(要分類㗎)
你睇吓啲屋，點解會用鐵籠圍住㗎，如遇火災，咪好大鑊，實死冇生喇(見澳門有啲屋都係咁)環境好差
☝行到死死吓，又行咗到第二個景點光華觀光夜市
攤檔在馬路兩旁，險象環生，睇見咁都唔想多行喇，好快行完…走人lu
☝搭的士到第三個景點愛河
☝愛河兩旁有好多咖啡店和雪糕店(和愛侶邊談心、邊欣賞愛河景色)
我哋又入鄉隨俗，買咗杯 gelato(都唔好食)
好彩有陣陣海風吹嚟，又唔太熱，不過就曬咗啲囉
☝嗲完一輪，都要買票搭船喇(唔係點叫做去過愛河喎)
☝早啲冇咁多人排隊上船(但夜晚就靚啲囉，自己選擇)
上愛之船(愛滋、唔係化，唔好嚇我噃)
船上有工作人員介紹風景(好似冇乜嘢睇嘅，一場嚟到，都要㗎喇)
☝愛河兩旁有好多人散步兼放狗
隻金毛，哼…畀我見到佢食花呀(都唔知話佢係採花賊定破壞公物好)
☝超迷你嘅芝娃娃
做乜影我喎，我都唔識妳，話畀媽咪知拉妳(佢見到我影佢，不斷向我擺尾)好過癮㗎
☝喺高雄市電影圖書館門外有電影放送，都幾多人欣賞
另一邊，有喱對姊妹花唱唱做做(都唔知佢攪乜)
真係有好多街頭表演㗎
☝晚上，就咁睇愛河係咪靚啲呢，愛之船都開咗燈lu
☝離開愛河，又搭的士到第四個景點新堀江(唔識搭其他公車，其實都唔見有，唯有搭的喇，揾得嚟都嘥時間，嘥氣)
新堀江(有高雄西門町之稱)
賣嘅嘢好似旺角女人街咁，都唔啱行
☝買咗杯木瓜奶同蛋糕仔(唔好食同飲)
諗住食埋晚餐先走喇，逛咗幾個圈，都冇嘢食嘅，今日行到腳都跛，好鬼死攰喇又肚餓
又再搭的士到第五個景點六合夜市
☝六合夜市
☝十全藥膳坊
叫咗藥膳排骨同麻油麵線(排骨麻麻哋喇，我覺得士林好食啲同入味囉，而個麵線完全唔好食，淨係得麻油味)
☝店舖養嘅拉布拉多狗女，佢好頑皮㗎，飲飲吓水將個兜兜反轉，攪到通地濕晒(其實都唔駛綁住佢咁慘，又冇得自由行)
☝老牌吳
又再食過，貢丸湯、官材板(普普通通喇)
☝烤蝦(賣蝦嗰位姐姐幾惡㗎)
鹽烤蝦好好食(新鮮彈牙)
☝喺 7仔買嘢時，見到佢真係好可憐，無晒心機，好似有病咁，台灣實在有太多流浪狗喇(尢其喺 7仔門口)
再搭的返酒店，嗰個司機梗係 short short哋，差啲撞埋架綿羊仔度，絕不肯讓步，又開得好快，真係趕住去攞出世紙咩，馬路上又鬼咁多電單車，左穿右插，一架綿羊仔可載2至3人(細路仔或狗狗都有)兼唔駛戴頭盔，認真牙煙
返到酒店，對腳真係好攰好痛，好似唔係自己咁，真衰…冇帶安美露
快手沖番個熱水涼，撻落床，一覺瞓天光呀
