25/01/07(thu)
今日去 Everland 玩，到這個地方之前簡直多災多難，我們是跟旅遊書教的方法去的，當到達江南站下車，便找5002號巴士，哈…又好好彩好容易揾到，等車時，我們數過有幾多個站便可以下車，一共是七個，冇多冇少，車到上車啦，你知啦，坐坐吓個心又有D驚，因為唔係個個站都有人落，點樣數呢，又自以為好醒。於是便問坐我後面的男孩，我用英文問他Everland到未，撞鬼佢，一個都唔識聽，我便拿起韓文的書手指指問他，諗住實冇死啦，點知他都是耍手擰頭，有冇攪錯，英文話唔識啫，連韓文有埋公仔都唔識
，後生仔嚟wor，唔係連Everland都未去過﹖
唉…架車去到郊區，而我們真係數啱站喎，又畀我哋見到雞乸咁大隻字，寫住Everland，諗住實冇死啦，便按鐘下車，都係落錯車，真係大一大隻鑊
，原來睇見唔代表就到達，攪了一輪，都唔知去唔去好，冇理由放棄wor。其實我哋知點行上去的，因為冇行人路，所以唔多敢行。問街上一個女孩，她叫我們行上去，冇其它辦法，行路要廿分鐘，不是行和時間的問題，而是安全為上，馬路好多巴士，所以都好驚。諗了一輪
，只好小心翼翼啦，我們要在馬路邊行，其實諗番都幾危險吓，我們諗過在下車處再等番同一班車上去，但竟然間是沒有車站的，唉…大佬冇站就唔好落客，靠害咩！其實我哋係數啱站的。在車站徘徊擾攘差唔多一個鐘，先至敢行上去，最衰一架的士都冇，你話幾慘，搭巴士對身在外地旅行的朋友嚟講真係好煩，如果唔係點對點，真係唔好客氣啦！
其實我們第一天已好唔【老黎】，浪費了好多時間，不過係咁架啦，鬼叫你自由行咩！
