喺馬卡龍頭上動土 ^O^ ~

 

 

 

 

馬卡龍真係令我又愛又恨
愛它賣相漂亮同高貴
恨它不是我杯茶
但又要死心塌地要繼續做。。。
因還有一團火
它總是帶給我無窮盡既靈感
每次做。。。都會有很多 idea 同驚喜
所以欲罷不能 (笑)

其實呢個都屬於 Macarons day 3 的
因太長喇‥唯有縮短去(笑)
一日做咁多隻
雖唔駛切切、刴刴
碗又唔駛洗好多隻啫‥
但‥真覺有點兒攰呀))))))))))
下次還是做一至二隻好喇
免生厭。。。

臨近中秋
都做咗啲馬卡龍月餅
唓！而家都唔會理係唔係月餅嚟架喇
喺上面又整色整水囉

得嗎﹖

wild ~~ (笑)

 
上次講想再做
咪就係呢啲囉‥

哈。。。好好彩
第一次做叫做成功(都唔算第一次，係第二次才真) 、可以喇
其實上年已做過一次了
上面既各種圖案同文字
唔係在焗完後才畫上去的
這個咁簡單
駛鬼話要試咩！

上面既圖案係喺唧完馬糊後
再唧上去的
然後才焗啊！

難。。。咪就難在呢度囉！(笑)

好多人話佢很難做
對佢又愛又恨
我‥認同架 (笑)
成功唔裂、又要出裙邊
已很開心了
現在還要挑戰在它頭上動土
攪攪震
唔裂就奇啊！
初初做時我都有懷疑
究竟 work 唔 work  架
唓！後嚟想深一層
又唔駛死嘅
唔得咪益大口仔囉 (笑)

雖不很美
但‥總叫做試過吖
不是齋 talk 啊‥

下次吖‥會力榛完美
外面冇架
只此一家咋(笑)

 
簡單做既又有

 

用紅麴粉做的
玩得太多色粉喇
都唔知有冇害的(笑)
咪做吓啲天然囉)))))
取得平衡呀！
自欺欺人 (笑)

紅麴粉冇味的
加了餡就好味多




一日做咁多
真係人都癲架
下次咪囉
不過‥真係好多謝馬卡龍
係佢令我既思維再次動起嚟
(唔駛老人痴呆)
滿腦子有唔同的構思
不過唔好諗埋啲天馬行空就好喇(笑)


再講上次嗰堆已送晒出去
今次呢堆亦然
最好笑係我送給一個女生時
她又要高調曬給同事看
攪到佢哋依嘩鬼叫
尤其女生，每個眼神充滿羨慕
我明架，呢啲咪虛榮囉 (自己都係) (笑)
你試吓送曲奇吖
最多咪好呀，多謝啊！
但‥唔好理佢好唔好食又或鐘唔鐘意吃
一送這個
十個女仔九個會好開心的
如包裝靚靚既話
真唔同講法架
萬試萬靈 (唔駛質疑我既說話) (笑)
一個十多廿蚊
又係貴咗啲嘅‥
唔係個個捨得買架
扮嘢另計‥


希望好快又有新作喇 (笑)

 

 

 

 

食在台北 @ day 3~

 

 

舊年聖誕既台北遊記
攪到咁耐都還未寫完。。。
自己都覺有點兒過份
再唔寫。。。下一個都唔知點寫囉)))))




我自己就冇乜景點好寫喇
除咗食囉
呢間喺網絡上幾有名氣
好唔好食，真要食咗至講
內裏漆黑一片
點睇都唔似食嘢啩
好多人架，唔駛一陣已座無虛席了。。。
還要左搭右搭枱架！

食物很快端上
兩條友就叫咗這些了

非常好味兼入味
又軟又腍又滑
同day 2 吃的相差甚遠啊！

唔記得佢係腿節 or 腿扣囉
切埋個你吃
食得冇咁狼狽
超讚！
聽講真係要早到才有架
早起既鳥兒有好嘢食，真‥真‥冇錯
會很快買晒‥
當然又係非常好味道囉。。。

佢哋啲燙青菜
特別好吃的
何解！

例牌必叫的
好鬼入味
我特別鐘情吃豆腐
(但‥不會吃人家豆腐) (笑)

這個又是不得了
很怕吃到些有豬燥味的肉
雖則係有豬皮
但‥自己已豁出去了
好好味呀！

價格在此
營業時間在此
不過‥時間應有些出入
要吃的‥自己攪掂了 (笑)

一開檔已做不停手

外賣亦唔少

聽講每日都很多人排隊外賣和進店吃的
好吃的東西
係應該咁架‥‥

食飽飽
在附近逛咗一圈便鬆人了
有乜鬼好行吖
睇見都唔多開胃囉 (笑)



******************************************
又返番去台北車站一帶逛囉
除咗京站可逛外，不過咪又係商場一個
冇乜特別囉，對我嚟講 (笑)
另台北火車站翻新過
有很多新的食店
不過就超多人
要排隊吃的話‥就咪囉
尤其在地下，開了間日本嚟的芝士蛋糕店
多人排隊到，我想買嚟一試
都不能啊！！！
在台幾天如是

係呀！又係食嘢時間
都三點三囉
呢個都好些，包內係牛肉

這個係雞扒
冇味冇道、意粉又酸
都係嗰句喇
西餐都唔係太啱我倆
當然‥有例外的

超酸的橙汁

通街都見有的連鎖店


*************************************

喺台北打下書釘
逛吓其他
便回西門町了
放下戰利品
hea 吓、梳洗吓
唔好唞太耐呀，唔係唔願再出去架

晚上想吃牛肉麵的
其實係早一晚想吃那間的
點知自己改動了
去到目的地
門口貼紙寫住休息一天 shit
唉！又唔早出聲
便退而求其次吃了這餐
因之前吃過米粉湯好吃囉
又想試新
都尚算可以咋‥

我唔食大腸的
經店主推介，都免為其難叫了吃
哈‥估唔到真係很好食

喺台北都見唔少有米粉湯的店
那間好吃，真唔太知
成日話自己有幾多年歷史
當然呢間唔及前那間好吃喇‥
但‥都不過不失了！

寫得真的好~絕對認同~

在網上找來的
好的當然要 po 喇
絕對認同說法。。。

 

 

黑芝麻芝士包包~

呢排出網誌好像密咗啲喎
其實可以的話
想每天一 blog 架
我知係冇可能囉
fb 都冇喇
何況喺呢度吖！
嘥氣。。。

包包一直有整
只係有時覺很煩費事影囉
尤其另一半在
我大多唔會架喇(笑)

沒什麼特別
用了黑芝麻粉罷了
一如以住都係用日本食譜

睇過孟老師教整包包
話底同面唔可太厚皮同燶喎
咁樣應該算合格喇啩(笑)



其實我唔太愛整關於"心心"既物體架
好似好刻意咁
曾見一女生
佢做乜鬼都加心心的原素上去
我看見曾有想嘔的感覺
唔好誤會呀
我不是岐視啊！
只是個人不愛啫‥

內裏塞了一粒芝士
好味與否
實屬見仁自智
我當然喜愛才這樣做囉(笑)

模樣就是這樣子了
別人送的模具
還是要再用的‥
無謂浪費啊！

香草蕃茄包包~

甜品我倆真係唔太好
所以都唔會成日做
除咗芝士蛋糕
還是做包包好啲
起碼唔太肥
又可以每天吃喎‥
幾好吖！ (笑)

有時間真想做多啲啊！
初哥係要不斷練習、練習架
唔係點會進步 (笑)

超愛這個 pat pat 造型

好軟熟啊！
又有濃濃的香草同蕃茄味
既愛做蕃茄麵條
又愛做蕃茄包包 (笑)
我倆摯愛！

莧菜麵條~

得閒又出吓網誌先
積存了太多喇‥
簡簡單單
做吓麵條囉 (笑)

話就話簡單
如比老公看見攪一大輪

佢多數會話出去買好過喇
又唔係貴))))))
幾銀嘢已有一斤 (泣)
有時我都會咁諗架

不過。。。好快會閃過
望見成果
又會發出內心微笑囉
老公，你唔會明架
以我咁鬼懶
其實我都肯做你咪執到囉
佢成日講，係就係)))))) 執到 pat 屎嗎！ (乞人憎)
起碼你都有啖好食吖‥(笑)
唔駛成日出外吃啲冇益嘢喎

(抵死呀佢！話影到似貞子把頭髮喎，乜係咁既色咩﹖﹖﹖) (笑)

佢絕人造色素兼無添加
Less is more
有淡淡的莧菜味
我鐘意呀！