又熱又落雨
喺屋企可以做乜
打機又打到悶
見無聊，咪整理一些食譜
今日都未打過咁多字呀
打到手都軟啊！(笑)
肚仔餓，想食腸仔包，又唔想落街喎
唯有自己焗
雪柜有大把貨啱 cook book 所需
就產生這個 " 鹹 " 嘅 ，冇錯係 " 鹹 " 呀 )))))))
用鬆餅糊做鹹嘅鬆餅
食過未呀！
用咖哩粉炒下香腸加上芝士
同無糖乳酪
試想像中會係點！
係唔係接受唔到呢！﹖(笑)
另一半第一啖擺落口吃時，話有啲怪喎
再食又話愈食愈好味
仲好食過腸仔包
我都覺係架！
最愛有咖哩香味
配搭得相當唔錯
好正呀)))))
自己買餸只愛到超市
尤其日式
最唔鐘意逛到處都有嗰兩間
每次買完嘢都要小心 check 單
因很多時都收多錢
有時沒有留意回家後才發覺
可惜已太遲了…
買了這本 cook book 很耐
還沒有跟書做過一款餸菜
忽然心血來潮
便做了以下一款
書中說明要用新鮮雞髀扒
而我只用了雪藏的
味道唔差喎
但…如果沒有用過新鮮雞再做一次
都會有這個感覺
(當然早已知新鮮雞係好味啲喇，你估我傻咩)
因自覺這味咸雞用雪藏都可以
諗兩個唔會相差太大
點知…
齋睇新鮮雞顏色已羸幾個馬位了
肉質又嫩又滑、鬆鬆軟軟又有雞味
很是好吃
其實到現在還一直認為用雪藏或新鮮都可以的
當然睇自己要求去到邊喇…
淨睇相片已有分別了
何況係食呢！
點揀自己決定…
影完相後，我會將所有雞皮撕掉才吃的 ^.*
同朋友傾開
佢屋企有啲西(衰)人，好鐘意從窗外掉垃圾
有天家中工人姐姐從廚房望出
見主人房冷氣機頂上有不明物體
因遠的關係，看不清是什麼
請 mom 一同看看，原來係一條食過少少的魚
係煎過的紅衫魚呀 (唔係一張紅衫魚) (笑)
激到朋友生蝦咁跳，立即致電管理處投訴
派人到場清理
所以話乜人都有…
朋友想食
雖然唔太想做
既然可以清倉，又繼續做囉
兩種味道
至愛蘑菇頭
一件不留
全部送晒畀我最憎嗰幾個 (笑)
(佢哋肥好過我肥嗎) ：)
天氣一天比一天炎熱
行出街已差唔多成身濕晒
夏天逛街對我嚟講係一件苦差
唔鐘意夏天天氣
只愛冬天
因香港冬天都唔太凍
i like it
佛誕假期，相約好友飯敍
其中一位係 vegetarian
我哋幾個人就一個都唔太過
在佛誕日齋戒都好應該吖
" 大自然素食 " 都食過幾次了
非一般傳統齋舖
我鐘意這個多啲呀
當天吃午餐，已全店滿座
雖有訂位，都要等待片刻，才可入座
" 沙嗲羊肉串 "
上次吃過已覺好正喇
其實應該講係每次都必叫的
最好笑係點菜時，其中一位朋友話我唔食羊架
聽完都笑了出來
呢度係素食店，何來有羊食呢！﹖
我話【妳諗多咗喇】
大家相視而笑！
" 欖菜乾扁四季豆 "
係好惹味，不覺稍嫌四季豆太腍了
沒有什麼噍頭啊！
同埋所謂的一些肉碎咸了些
齋空口吃係差咗啲囉，配飯會較好
" 軟殼蟹卷 "
睇 " 開飯 " 食評話呢個好好味
妖！係真唔係呀
只是一般過一般咋喎
又話佢似真的軟殼蟹，唔覺囉
紫菜全部 " 淋 " 晒
加上味道唔覺好味
何來必叫呢！
" 生煎菜肉餃 "
上次叫過係蒸的
唔好食，今次有人叫煎的
結果一樣，冇味冇道
皮又厚個棉胎，咁形容雖誇咗啲，但…夠貼切嗎﹖
最憎吃皮厚的餃子
把鬼呀！
" 日式海鮮薄餅 "
夠晒脆同香口，不過好漏啊
" 法式焗多士 "
呢個係六個最好味的一個
上面係一層芝士、內有牛油果同類似吞拿魚碎
經烘焗非常香口惹味
大家異口同聲讚口不絕
在座有人想再次 encore
給我們嗌停
見好就收吧！
另一位素食朋友話，鐘意食的到她家作客，弄給我們品嘗
好容易整…絕無難度喎
咦！咁我都識整呀…
其實呢間算是不錯的新派素食店
每樣食物都做到唔似素食
唔講你知，都可能唔知 (包拗頸除外)
茹素者同齋口唔齋心者
有這樣一個地方聚腳
確是不錯啊！
真係熱到人都癲…
開冷氣未呀﹖
有冇聽過【屎】都可以嘆冷氣呢！
我個寶貝仔就係咁大方畀碌屎嘆喇…
佢一發脾四就會喺廳痾臭臭
有時佢自己又會被困厠所內 (原因不詳)
留下碌屎在廳中獨享
放工回家看見此情景，唔知好嬲或好笑了
認真激鬼屎呀！
自認教子無方…
但冇計！鬼叫佢喺我老闆嚟咩
哈哈
好喇！言歸正傳
唔好講埋啲咁嘅嘢喇
又要開爐焗焗焗
食譜係用 ほうじ茶(焙煎茶)的
咪自把自為
改用了伯爵茶 (我對這茶一般咋)
栗の涉皮煮又改了甘栗
因為冇吖嗎！﹖
話明要清倉，冇奶油再買喇
再買就變咗上倉囉喎
似唔似月餅呀 (笑)
自己冇把茶葉浸透
變咗沒有茶葉香味，嘥料啊
好彩甘栗都唔差，甜甜哋都唔錯
加上又減了糖
唔係實甜屎…
呢個我覺麻麻啫
我諗浸泡過嘅茶葉會散發到香氣會更好
可惜沒有做到這點
唔知用ほうじ茶會唔會好啲呢
下次都係諗諗跟原著吧！^^
呢排以為個 blog 風平浪靜
點知唔係
仲諗住放番回應欄出嚟
唉！咪一鬼樣喺舊有的網誌度留啲不知所謂垃圾
另一半同我講西(衰)人多的是
莫非真係【野草燒不盡、春風吹又生】！
上次喺 " 清真惠記 " 食過啲又死實又冇味嘅蘿蔔後
心心不忿
咦！乜好難整架咩﹖
好…不求人，自己做
唔好攪到一鑊泡就得喇！
又睇吓自己做到乜鬼樣 (笑)
" 醬燒大根扒 "
有冇諗過鋸呢啲扒呀﹖！
係揸住刀义嗰隻嚟鋸蘿蔔喎 (笑)
唔慣用刀义
咪用筷子 " 拮 " 住食都唔錯架
好似食珍寶珠咁
我鐘意呀…
嗱！又整咗兩次喇
唔好話我怪人呀
夠腍又甜又好味，冇渣架！
味道一樣，只是整色整水唔同啫
你鐘意邊款呢！﹖ (笑)
另一半很吝嗇的，甚少有讚美說話
只會話我咁鬼烏 where 架
煮餐飯啫，攪到廚房七角咁亂
好彩託賴 " 狗狗同佢 " 經我手煮嘅嘢仲未食死咋！﹖
有冇九菜呀，唔讚都算喇
講埋啲咁嘅說話…無良呀！
罷工！
(佢唔驚架，因大多數是他入廚的) ：)
我係 part time 咋
HAHaHa ^O^
從來沒有諗過會在家可做到的
真係諗都冇諗過架！
只知想食，就要出外買
別無它法
現在…哼！
不假外求了!!!!!!
某日上網尋找食譜，得知可以這樣做法
可惜忘了來源，不能出名鳴謝，深感抱歉！
因唔知自己做出嚟效果如何
只 "小試牛刀 " 買了小小一嚿嘗試
費事失敗又嘥錢又嘥力呀！
沒有買豬插，在插豬皮嗰環已弄至手軟
好在另一半幫忙
才能完事！
睇睇相片，雖沒 " 豬插 " 幫忙，但爆花效果尚算理想
我亦知有食譜毋須用豬插的
但唔知點解我沒有這個衝動嘗試 (笑)
只得數嚿咋
可能小食多滋味喇
兩條友爭食呀 (笑)
外皮卜卜脆，肉唔嚡又腍
味道又夠晒咸香
另一半話唔係睇住我做
真以為我在街外買回來的 (笑)
咁…即係呃得吓人喇 >.*
_ _ _ _ _ _
某人投訴我正一怪人
好食嘅嘢只做一次，跟住就唔會再做第二次架喇
咁…好喇
既然出到聲 (笑)
take 2 又何妨啊！
今次有經驗喇
買了嚿大啲的豬腩肉
好彩冇失手，唔係又畀某人取笑喇
不過今次沒有他幫忙插皮
真係插到手都跛呀…
都係諗諗走去買番個豬插好喇！
今次嚿豬腩有骨的
賣飛佛，唔准同我爭
好好味架，有少少肉黏住嚿骨
正呀！
呢個係佢至愛
肥瘦適中
味道同第一次做沒太大分別
不過咸了少許
焗時因搽在豬皮上的鹽跌了在肉上
下次真要小心啊！
今次就覺多咗啲囉
食落有啲漏呀！
你話人幾 cheap 吖
" 小 " 就要爭食，多咗又話漏喎 (笑)
好難服侍…
* * * * * *
甚少到街市走
只愛到大型 super 逛逛
某日想買豬肉焗义燒
發覺肉柜沒有想要的部位
便多口問一問肉檔職員
她竟然指住一堆豬肉，呢啲喇，可以架喇
唔係化，成嚿燒排骨咁款喎
真係大鄉里喇，我從未食過有 " 骨 " 的义燒囉
逼於無奈
還是要到街市走走
肉檔哥哥很好人，說明所要
便揀了一嚿撕了皮又不太肥的豬腩肉給我
回家後我當然把還附有太多肥膏的剪走
便焗出了這個半肥瘦义燒了
哈！效果我覺比枚頭還要好喎
相片中的不是油
只是搽了蜜糖
呢個义燒食譜喺我買 cook book 得來的
又簡易又方便做
真的不錯！
义燒共做了三次，一次比一次好
另一半話真好喇
以後想食可以在家整了
有時出外買都未必買到好食的
所言非虛！
上次講過有太多積存要清
所以又要開爐
" 黑芝麻鬆餅 "
這個味都係第一次做的
用了黑芝麻粉
非常香口、好吃
這個日本食譜做出嚟的效果
內裏係鬆鬆、散散、軟軟的
絕不糊口
我較愛用這個食譜製作
充滿了黑芝麻碎既香氣
吃後要小心牙罅殘餘點點黑芝麻粉屑啊！
清潔好才可露齒見人 (笑)
* * * * * *
同場加插了一張唔關我事的
因唔係我整嗎！
" Lamingtons "
喺 MX 買的
已出了很久，而我亦試食了很耐
只是未有放上 blog
今次又拿來講講喇
味道到現在好似已有四隻了
而我只試了以上三隻
最好味係檸檬，非常清新的口感
綠茶同朱古力就麻麻喇
尤其係綠茶，完全唔得！
簡易既整法
自己做完全唔難啊！
如屋企多人，首選 homemade
因一件都不便宜…
還是自家製作好！
朋友問想留言
但…點解要收埋個回應欄呀
講過喇…唔再講
如有心的請到我新家吧！
寫開的見好多都唔再寫又或搬家了
【有人辭官歸故里、有人漏夜趕科場】
天下無不散之筵席
係不變的定律
以前的一群質數很高的
現在！唉…
* * * * * *
呢排多咗喺屋企玩煮飯仔
另一半當然開心多喇 (笑)
" 金平牛蒡、蓮藕 "
呢個和風小食，我好鐘意吃的
灑上芝麻同吃香口好多
牛蒡有益唔駛多講喇
自己整會煮一大碟，留番啲入雪柜
第日凍食亦很可口
又脆又爽
加了兩隻紅椒仔同炒，已辣到飛起，不過又很好味
我倆 " 噍 " 都 " 噍 " 到牙骹緊晒 (笑)
係一個唔錯的口部運動
好過 " 噍 " 香口膠喇！
唔愛蓮藕，可配紅蘿蔔同炒
又係一個很好的配搭
做沙律又可…
可作多樣變化啊！
女士們聽到呢味可做減肥餸菜，係唔係覺唔錯呢！
有益又健康呀：)
上次喺元朗食過好一般的 " 鵝髀 " 後
講過會再去食 " 清真惠記 " 的
話係 " 滷水蘿蔔 "
睇個樣就似係白烚蘿蔔喇
食落仲屎，冇味冇道、硬到筷子都篤唔穿
究竟乜嚟架
咁生就唔好拎出嚟賣喇
呃人架！
還是穩陣食番至愛 " 鴨髀 " 好喇
真係皮脆肉嫰
" 鴨 " 都可以做到這麼出色
同 " 燒鵝 " 有得揮啊！
不過唔係同元朗嗰間比喎
另一碟加了咖哩汁
撞鬼佢吖，冇講另上咖哩汁
竟然將咖哩淋在鴨髀上 (應該淋在飯面嗎)
攪到整隻髀啲皮腍晒
當然冇咁好味喇，嘥鬼晒呀！
其實燒臘同咖哩兩者係唔 match 的 (我哋認為)
咖哩搶晒鴨髀既味道
失色了很多啊！
以後真係要切記齋吃燒鴨飯好喇，唔好整色整水囉 (笑)
同唔好再叫啲把鬼滷水蘿蔔
(邊鬼個話好食的，自收兩件)
自己好鐘意食雜錦有味飯
港式有嘅 " 冬菇雞飯 " 、" 臘腸雜錦飯 " 或 " 糯米飯 "
總之唔係 " 田雞 " 就得喇
我唔係唔鐘意食田雞喎 (其實好好食架)
自從知道 " 田雞 " 有蟲後
什麼食法都好 (除非拿來煲) ，否則很難把牠整死
所以怕怕！！！
日式有以上各類飯素
當然唔係咁少喇
不過香港日式 Super 都唔覺有太多選擇
上面嗰啲有些在日本買回來的
我好鐘意用這些煮架
用飯素煲出嚟係咁喇
因唔同款式，個別會有些唔同
大致上都差唔多喇！
不過比較肥膩，多咗啲油
如果唔係就好囉
鐘意食的我，當然話好味道
所以問我都嘥鬼氣 (笑)
－ － － － － －
唔想買＂飯素＂的 ，又怕肥膩
都可以自己買材料煮
不過唯一煩嘅
就係為咗煮呢餐就要買埋一堆嘢喇 (妹仔大個主人婆)
划唔划算，自己諗囉
我哋鐘意食所以冇所謂…
材料有以上各種
五加一
加加減減，悉隨尊便
我唔敢教人煮，因唔係叻，無謂獻醜 (笑)
所以喺我個 blog 度，係唔會揾到食譜的
就係呢個原因
點呀！
唔係用 " 飯素 " 煮的同自己買用料整的有何分別﹖！
自己揾答案吧！
記住用日本米煮呀
好食好多架…
おいしい～～
唔係好想做的
但…都要做
因各類物品就快到期
費事畀人 "哦 " 喇
只識買、買、買喎
你屋企嗰件係唔係又係咁架呢！﹖(笑)
" 紙包蛋糕 "
好奇怪，蛋我鐘意食
唔知點解做了這個
完全不喜歡的
香蕉我食架，拿來做蛋糕
我又係唔吼架
係咪怪人一個！
鬆鬆軟軟，又有蛋香
其實係很好吃的
不知為何
始終都係接受唔到囉… (笑)
* * * * * *
喺日本買回來的抹茶又係快到期
因佢唔係 " 宇治 " ，可當茶飲用
它只適宜做蛋糕
所以唔做唔得…
跟食譜做的
似唔似呀，其實呢款蛋糕都做了很多次
只係味道唔同啫
自己最喜歡吃頂部
因很 " 鬆脆 "
整個 " 磨菇蓋 " 揭起食就最正的
內裏都唔差架
又係軟綿綿
顏色都不比 " 宇治 " 差吖
夠晒上色
味道又夠晒抹茶味！
正…
兩者我較愛吃這個了
