唔同版本のbiscotti

 

近排愛上在廚房鑽研，攪攪震嗰種

中、日、泰乜都整一番

竟然間"烘培"又要分一杯羹…

 

"意大利果仁脆餅"

呢個我係睇書學整的

酥酥、脆脆好有口感

有少少像合桃酥

但…所用材料比較冇咁健康

有"牛油"同"固體菜油"

我又覺這個較為可口

 

而呢個我喺網上揾既食譜

完全冇"牛油"同"固體菜油"成份

相當健康，其實兩個"糖份"都唔少架

呢個似變硬既麵包多啲

要好有牙力才把它吃完啊

啱狗狗攞嚟練牙力就冇得頂喇

老人家直情冇可能食到

這個我愛拿嚟點"周打蜆湯"

正架

想試既 starbucks 有發售

名字一樣 "Biscotti"

製法唔同，便得出唔同版本

食法都大不同

得出結果，亦咨詢食過既朋友

前者較為討好、好吃

又一証明唔健康既食物會較為好味架！

我都認為係囉

哈~哈

 

下次我會整番長少少

賣相會靚多多

咁…至忠於原著

 

油麻哋好食@魔鬼蛋糕

 

又比廣告吸引

上次"天使"冇買嚟食

今次終於上當

因我極愛"朱古力"之故

 

"魔鬼蛋糕"

賣相唔錯吖

唔知好唔好食啫

 

裏、外都被好多 cream cream 圍住

反而覺"漏"加"滯"

朱古力唔夠濃味

鋪在蛋糕面既朱古力脆脆好食啊

整體就麻麻咋

 

"彈"都算"幾彈"既蛋糕

我覺還是齋食戚風好…

都係…時候為自己做一個了

 

 

其實自己好口臭架

每次話好好食嘅嘢

一係唔再做、又或是冇得賣

所以呢個唔怕講

話知你冇得賣吖

反正我唔吼囉…

哈…哈

 

一食再食@粥棧小廚

 

自己好少同一間食店會不斷幫襯

始終外面有咁多美食

當然要逐間試試喇

唔係點至試得勻(其實點可以試得勻丫)

係都係"自欺欺人"啫

 "粥棧小廚"

食極都還未厭

 

"美極蝦"

蝦夠彈牙、新鮮又夠人味

是我至愛一味

 

"豉油雞"

呢個都食個幾次喇

夠滑、唔韌又係用鮮雞煮的

還有係最正既"豉油"

食剩既，真想拎回家撈飯吃

 

"魚頭煲"

炸得又香又脆、味道又正

是必叫的

 

"蒜茸炒芥蘭"

整碟一塊葉都冇，實屬難得

出外吃，食店都很少會捨得摘去所有葉唔要啊！

除非好貴囉…

呢間小廚，價錢係比同類食店或酒樓貴少少

食物係每碟都大大碟

所以我認為值得架

起碼人哋真係比到啲有質數既食物你吃

唔會偷工減料

羊毛出咗羊身上啊！

                                         

 

 

味千拉麵@熊本

 

喺九州食過味千拉麵

味道唔錯、好食

而喺香港既港版味千，就麻麻喇

香港超市祖國版味千拉麵

只覺一般

又硬又唔好吃

 

係熊本既味千拉麵

豈能錯過

(同祖國版價錢差唔多相差三倍)

實在昻貴

 

麵質同祖國版差好遠

軟軟的麵條加上濃濃的湯汁

非常好味

尤其是煮時，嗰包湯料香到不得了

下次見有，一定會再買架

 

 "たらみ"既啫喱賣飛佛

 

最好味係"桃"同"雜菓"

是我至愛

唔買真係忍唔到手

                                     

 

 

熊本@太平燕

 

今年美食節

竟然間連去兩日

真係又有想買既嘢喎

只不過拎唔到咁多啫，但…都攪到好似個"傻婆"咁

每人左兩袋右三袋

相當狼狽，辛苦到屎

買既食物，大多以日本嘢為主

一見到係日本嘢，會不自覺睇加買喇

(可惜唔係太多吖)

"日本製造"難道真係矜貴啲

 

"太平燕"(粉絲)

去"熊本"時食唔到，見有當然買嚟試試

(未見過香港超市有售)

 

日本嘢就係呢樣好

實有清楚教你點煮，絕少失誤

 

內裏有兩個粉絲同味粉、蔬菜包

(粉絲相當細個、兼少得可憐)

仲話二人前，一個人食都唔夠喇

 

話咁快就煮好有得食

(真正既太平燕係用雞骨同青菜熬煮清湯的)

雖然我喺"熊本"冇食過真正既"太平燕"

冇得比較

但呢個以方便麵製作

好彩都好好食(不過唔夠兩啖就食完)

係貴得有道理嘅

"湯"都差啲給我喝清，因太咸關係，所以放棄

講真吖，兩條友食

認真"到喉唔到肺"呀

希望下次再到"熊本"，有機會一嗜

 

"西瓜雪葩"

唔太甜，有陣陣西瓜幽香

已擺喺冰袋喇，返到屋企都係"溶溶哋"

唔理喇，最多咪肚屙

暫時食咗咁多先咋，下次有機會再講其他吧！

(做人真係好簡單，同鐘意既人一齊食到鐘意既食物)

大滿足！

                                        

 

 

有幾好味@東記上海麵

 

某日去咗大埔壚街市

吃好多人話超級好食既"豬扒"

 

"東記上海麵"

兩個人去食，梗係一人一碗喇

想食雞亦，已售清

咪變咗叫以下嗰種唔想食既配搭

 

"菜肉雲吞加豬扒上海麵"

 

"墨魚丸豬扒上海麵"

先講兩個麵食同餸簡直嚇人

"上海麵"既硬又冇味

(我自己在家煮比它還要好吃，大佬…唔好忘記你開檔做生意架)

"菜肉雲吞"同"墨魚丸"又係得人驚之作

"菜肉雲吞"完全沒有味道又唔好味

喺超市買的"灣仔碼頭"比它好吃多多啊

"墨魚丸"唔似"墨魚丸"，又硬又冇味

彈唔彈牙唔需講喇

兩碗嘢真係認真唔係"麻麻"呀

係認真差…差…差

 

唔好話我只識彈而唔識讚喇

"豬扒"兩個都係分開上，呢樣咪讚囉

最怕啲炸物放在湯上，因而把它變淋影響口感

大件都幾大件架

呢個係一人份量

 

我只覺普普通通囉

好彩唔嚡、但唔  juicy

誠意係有架，起碼係即炸吖

試過一次夠喇

一間如果淨係話"豬扒"得嘅而其他配料唔得

咁…有乜用呀！﹖嘥鬼氣

如果講好味喺柴灣嗰間  耀東號 好食佢好多

 

 

三色素麵

 

熱辣辣，又冇乜胃口

最好整冷麵吃

雖然又要過冷河，係就係煩咗啲

但…因鐘意食

冇計

呢幾日都係以佢維生

 

"烏冬"、"蕎麥麵"齋食冇料都很好吃啊

最緊要可以同時減肥

一舉兩得

 

 

逛超市見有特價

當然買嚟試試

 

四國出品，有保証

 

"三色素麵"

齋煮一個就簡單，要煮齊三色

真係超級麻煩

要分開煮，又唔可以一齊擺晒落煲

因會變成大兜亂

呢款煮一次夠喇，都係分開食好啲

三色除"梅味"唔太愛外，其餘兩色都唔錯架

煙煙、韌韌

"正"

 

再配埋"帶子刺身"同吃

真係大滿足喇

         

                          

 

Don't miss

 

上次食過 北海道牛奶軟雪糕後

心思思又想再食過

 

"牛奶軟雪糕加紅荳同白玉"

呢杯咁嘅嘢要 $30大元

因加了以上兩款

 

杯內有三粒"白玉"和少量紅荳

煙煙韌韌，不過我唔 like

(我好怕食湯丸咁既物體，因唔識吞)

其實唔提意加囉，冇乜特別

又貴咗 $8蚊雞

雪糕依然好味

唔知點解加嗰兩樣嘢，都整咗好耐

攪到杯雪糕差唔多"溶"咁滯

 

 

今年至第二次食咋

真係令人回味

 

呢個時間係收穫期

所以唔好嘥咗個咁好機會

哦…原來水蜜桃日本首選係"山梨縣"最靚

 

我唔執輸

都買咗兩個又红又大既 もも

 

今次買真係好大…大個喎

 

未食睇到都流口水

 

 

又多水又多汁

加上非常清甜

令人無法抗拒

 

"件披"都薄如蟬翼，一撕即破

唔好嘥

係應該連皮一齊吃的

 

我又攪攪震

攞咗幾片桃嚟做果凍

一樣咁好味道架

(嫌煩梗係唔好學我喇)

 

 

逛親超市就停唔到手

梗要買吓至安樂

 

我好鐘意食呢款"たらみ" jelly

好想日日食啊

 

呢款有各式唔同雜果

好好味道

當然還有多款選擇

呢個都幾似我整嗰款 雜果果凍 喎

但自己買材料，又唔可以每樣買啲啲

生果又貴

都係買呢個較為划算呀

(雖然都唔平)

乾手淨腳，啱懶人如我

大滿足！